Fraud: ಕ್ರೈಂ ಬ್ರಾಂಚ್‌ ಹೆಸರಲ್ಲಿ 1.60 ಕೋ.ರೂ. ಪಡೆದು ವಂಚನೆ   

ಮಂಗಳೂರು: ಮುಂಬೈ ಕ್ರೈ ಬ್ರಾಂಚ್‌ ಅಧಿಕಾರಿಗಳೆಂದು ಹೇಳಿ ಬೆದರಿಸಿ ಮಂಗಳೂರಿನ 72 ವರ್ಷ ವಯಸ್ಸಿನ ನಿವೃತ್ತ ಎಂಜಿನಿಯರ್‌ ಓರ್ವರಿಂದ 1.60 ಕೋ.ರೂ. ಪಡೆದು ವಂಚಿಸಿರುವ ಘಟನೆ ಬೆಳಕಿಗೆ ಬಂದಿದೆ.

ಅಪರಿಚತ ವ್ಯಕ್ತಿಯೋರ್ವ ನಿವೃತ್ತ ಎಂಜಿನಿಯರ್‌ ಓರ್ವರಿಗೆ ಕರೆ ಮಾಡಿ ಆತನನ್ನು ರಾಜೇಶ್‌ ಕುಮಾರ್‌ ಎಂದು ಪರಿಚಯಿಸಿಕೊಂಡಿದ್ದ. ಫೆಡೆಕ್ಸ್‌ ಕಂಪೆನಿಯಿಂದ ಕರೆ ಮಾಡುತ್ತಿರುವುದಾಗಿ ಹೇಳಿಕೊಂಡಿದ್ದ. “ನೀವು ಮುಂಬೈನಿಂದ ಥಾಯ್ಲೆಂಡ್‌ ಒಂದು ಪಾರ್ಸೆಲ್‌ ಕಳುಹಿಸಿದ್ದು ಆ ಪಾರ್ಸೆಲ್‌ನಲ್ಲಿ ಅಫ್ಘಾನ್‌ ಮತ್ತು ಕೀನ್ಯಾ ದೇಶದ 5 ಪಾಸ್‌ಪೋರ್ಟ್‌ಗಳು, 3 ಕ್ರೆಡಿಟ್‌ ಕಾರ್ಡ್‌ಗಳು, 140 ಗ್ರಾಂ ಎಂಡಿಎಂಎ ಡ್ರಗ್ಸ್‌, 4 ಕೆಜಿ ಬಟ್ಟೆ ಹಾಗೂ ಒಂದು ಲ್ಯಾಪ್‌ಟಾಪ್‌ ಇದ್ದು ಅದರ ಬಗ್ಗೆ ಮುಂಬೈ ಕ್ರೈಂ ಬ್ರಾಂಚ್‌ನಲ್ಲಿ ತನಿಖೆ ನಡೆಸಲಾಗುತ್ತಿದೆ’ ಎಂದು ಹೇಳಿದ್ದಾನೆ.

ಆ ಬಳಿಕ ಮುಂಬೈ ಕ್ರೈಂ ಬ್ರಾಂಚ್‌ನ ಅಧಿಕಾರಿಯೆಂದು ಹೇಳಿ ಇನ್ನೋರ್ವ ವ್ಯಕ್ತಿ ಮಾತನಾಡಿದ್ದಾನೆ. ಆತ ಕೂಡ ಹಲವು ಪ್ರಕರಣಗಳಲ್ಲಿ ಸಿಲುಕಿಸುವುದಾಗಿಯೂ ವಿದೇಶದಲ್ಲಿರುವ ಮಗ ಮತ್ತು ಮಗಳನ್ನು ಬಂಧಿಸುವುದಾಗಿಯೂ ಅದರಿಂದ ಹೊರಬರಬೇಕಾದರೆ ಹಣ ನೀಡುವಂತೆಯೂ ಬೆದರಿಸಿದ. ಅನಂತರ ಕೆಲವು ನೋಟೀಸ್‌ಗಳನ್ನು ಕೂಡ ಕಳುಹಿಸಿಕೊಟ್ಟಿದ್ದ. ಇದನ್ನು ನಂಬಿದ ನಿವೃತ್ತ ಎಂಜಿನಿಯರ್‌ ಮೇ 2ರಂದು 1.10 ಕೋ.ರೂ. ಹಾಗೂ ಮೇ 6ರಂದು 50 ಲ.ರೂ.ಗಳನ್ನು ಪಾವತಿ ಮಾಡಿದ್ದಾರೆ. ಅನಂತರ ಮರುದಿನ ಕರೆ ಮಾಡಿದಾಗ ಯಾವುದೇ ಸ್ಪಂದನೆ ಸಿಗಲಿಲ್ಲ. ಸಂಶಯ ಬಂದು ಮಗಳಿಗೆ ವಿಷಯ ತಿಳಿಸಿದರು. ಆಗ ಮೋಸ ಹೋಗಿರುವುದು ಗೊತ್ತಾಗಿದೆ.