ವನಿತಾ ಹಾಕಿ: ಭಾರತಕ್ಕೆ 4-0 ಸರಣಿ

ಕೌಲಾಲಂಪುರ: ಮಲೇಶ್ಯ ವಿರುದ್ಧದ 5 ಪಂದ್ಯಗಳ ಸರಣಿಯ ಕೊನೆಯ ಪಂದ್ಯದಲ್ಲೂ ಪ್ರಾಬಲ್ಯ ಮೆರೆದ ಭಾರತೀಯ ವನಿತಾ ಹಾಕಿ ತಂಡ 4-0 ಅಂತರದಿಂದ ಸರಣಿ ಕೈವಶ ಮಾಡಿಕೊಂಡಿದೆ.

ಗುರುವಾರ ನಡೆದ ಹಾಕಿ ಟೆಸ್ಟ್‌ ನ ಕೊನೆಯ ಪಂದ್ಯದಲ್ಲಿ ಭಾರತ 1-0 ಗೋಲಿನಿಂದ ಮಲೇಶ್ಯವನ್ನು ಸೋಲಿಸಿದೆ. ಈ ಗೋಲು ನವಜೋತ್‌ ಕೌರ್‌ ಅವರಿಂದ ದಾಖಲಾಯಿತು.

ಪಂದ್ಯದ ಆರಂಭದಿಂದಲೇ ಎರಡೂ ತಂಡಗಳು ರಕ್ಷಣಾತ್ಮಕ ಆಟವಾಡಿದವು. ಹೀಗಾಗಿ ಮೊದಲೆರಡು ಕ್ವಾರ್ಟರ್‌ನಲ್ಲಿ ಯಾವುದೇ ಗೋಲು ದಾಖಲಾಗಲಿಲ್ಲ.
3ನೇ ಕ್ವಾರ್ಟರ್‌ನ 35ನೇ ನಿಮಿಷದಲ್ಲಿ ನವಜೋತ್‌ ಕೌರ್‌ ಫೀಲ್ಡ್‌ ಗೋಲು ಬಾರಿಸುವ ಮೂಲಕ ಭಾರತಕ್ಕೆ 1-0 ಮುನ್ನಡೆ ತಂದುಕೊಟ್ಟರು. ಇದಾದ ಅನಂತರ ಗೋಲು ಬಾರಿಸಲು ಭಾರತಕ್ಕೆ ಅನೇಕ ಅವಕಾಶ ದೊರಕಿತಾದರೂ ಮಲೇಶ್ಯ ರಕ್ಷಣಾ ಪಡೆ ತಡೆಯೊಡ್ಡುವಲ್ಲಿ ಯಶಸ್ವಿಯಾಯಿತು.

ಒಂದು ಗೋಲು ಬಾರಿಸಿ ಉತ್ಸಾಹದಲ್ಲಿದ್ದ ಭಾರತ ಎದುರಾಳಿ ತಂಡಕ್ಕೆ ಗೋಲು ಬಾರಿಸಲು ಯಾ ವುದೇ ಅವಕಾಶ ನೀಡಲಿಲ್ಲ. ಕೊನೆಯ ಕ್ಷಣದವರೆಗೂ ಪಂದ್ಯದ ಮೇಲೆ ಹಿಡಿತ ಸಾಧಿಸಿಕೊಂಡ ಭಾರತ ಜಯ ಸಾಧಿಸಿ ಅಜೇಯವಾಗಿ ಮಲೇಶ್ಯ ಪ್ರವಾಸವನ್ನು ಕೊನೆಗೊಳಿಸಿದೆ.

“ಡಿಫೆನ್ಸಿವ್‌ ತಂಡಗಳಲ್ಲಿ ಒಂದಾಗಿರುವ ಮಲೇಶ್ಯ ವಿರುದ್ಧ ನಮ್ಮ ಆಟ ಹೇಗಿರುತ್ತದೆ ಎಂಬುದನ್ನು ಅರಿತುಕೊಳ್ಳಲು ಈ ಸರಣಿ ಬಹಳಷ್ಟು ನೆರವಾಗಿದೆ. ಯುವ ಆಟಗಾರ್ತಿಯರು ಈ ಕೂಟದಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ’ ಎಂದು ಪ್ರಧಾನ ಕೋಚ್‌ ಜೋರ್ಡ್‌ ಮರಿಜ್ನೆ ಹೇಳಿದ್ದಾರೆ.